ប្រែសម្រួល៖ ស-សម្បត្តិ

សង្គ្រាមស៊ីវិលស៊ីរីរយៈពេល១៣ឆ្នាំបានបញ្ចប់ជាមួយនឹងការដួលរលំនៃរបបបាសារ អាល់-អាសាដ ដែលនាំឱ្យមានការកើនឡើងនៃជនជាតិស៊ីរីព្យាយាមវិលត្រឡប់ទៅមាតុភូមិវិញ។

មនុស្សរាប់ពាន់នាក់បានជួបជុំគ្នានៅព្រំដែនលីបង់ ដោយឈរតម្រង់ជួរយ៉ាងវែងជាមួយនឹងទ្រព្យសម្បត្តិរបស់ពួកគេ ដោយទន្ទឹងរង់ចាំចាប់ផ្តើមដំណើរត្រឡប់ទៅវិញ។ ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនបានរាយការណ៍ថា មានការត្រឡប់ទៅវិញដែលបានផ្ទៀងផ្ទាត់ចំនួន៣៤,០០០នាក់ក្នុងរយៈពេលប្រាំបីខែដំបូងនៃឆ្នាំ២០២៤ ដោយរំពឹងថានឹងបន្តមាតុភូមិនិវត្តន៍រហូតដល់ឆ្នាំ២០២៥។ អាសាដដែលត្រូវបានទម្លាក់ចេញពីអំណាច និងក្រុមគ្រួសាររបស់គាត់បានរត់ភៀសខ្លួនទៅក្រុងម៉ូស្គូ ជាកន្លែងដែលពួកគេត្រូវបានផ្តល់សិទ្ធិជ្រកកោន។

ក្រុមឧទ្ទាមដឹកនាំដោយអាប៊ូ មូហាំម៉ែត អាល់-ហ្គូឡានី ដែលពីមុនមានទំនាក់ទំនងជាមួយអាល់-កៃដា បានកាន់កាប់រាជធានីដាម៉ាសដោយគ្មានការតស៊ូ ដែលបង្ហាញពីការផ្លាស់ប្តូរនៅក្នុងទិដ្ឋភាពនយោបាយស៊ីរី។

ការប្រារព្ធពិធីអបអរសាទរបានផ្ទុះឡើងនៅទីក្រុងដាម៉ាស ដោយមានអ្នកទោសនយោបាយដែលត្រូវបានដោះលែងជួបជុំជាមួយក្រុមគ្រួសារ និងអ្នកគាំទ្របានប្តូរទង់ជាតិសម័យអាសាដជាមួយនឹងនិមិត្តសញ្ញាប្រឆាំងនៅស្ថានទូតស៊ីរីទូទាំងពិភពលោក។

ទោះបីជាមានការសុទិដ្ឋិនិយមក៏ដោយ អ្នកជំនាញបានព្រមានអំពីអស្ថិរភាពដែលអាចកើតមាន ដោយមានបញ្ហាប្រឈមជាបន្តពីសំណល់នៃរបបអាសាដ និងក្រុមជ្រុលនិយមដូចជារដ្ឋអ៊ីស្លាម។

ប្រទេសជិតខាងដូចជាលីបង់ តួកគី និងហ្ស៊កដង់ ដែលបានផ្តល់ជម្រកដល់ជនភៀសខ្លួនស៊ីរីរាប់លាននាក់តាំងពីជម្លោះបានចាប់ផ្តើមនៅឆ្នាំ២០១១ សង្ឃឹមថានឹងមានស្ថិរភាពដែលអាចអនុញ្ញាតឱ្យមានការធ្វើមាតុភូមិនិវត្តន៍ដែលមានការរៀបចំ។ ទោះយ៉ាងណា នៅតែមានការភ័យខ្លាចថាអស្ថិរភាពដែលបន្តកើតមានអាចបង្កឱ្យមានរលកនៃការធ្វើទេសន្តរប្រវេសន៍មួយទៀតទៅអឺរ៉ុប និងតំបន់ផ្សេងទៀត ជាពិសេសទៅកាន់ប្រទេសអាល្លឺម៉ង់ និងចក្រភពអង់គ្លេស ដែលបានទទួលយកជនភៀសខ្លួនស៊ីរីក្នុងចំនួនច្រើន។

ក្នុងពេលជាមួយគ្នានេះ ការប្រកួតប្រជែងភូមិសាស្ត្រនយោបាយនៅតែមានកម្រិតខ្ពស់។ រុស្ស៊ី ដែលជាសម្ព័ន្ធមិត្តសំខាន់របស់អាសាដ បានធានាកិច្ចព្រមព្រៀងដើម្បីរក្សាមូលដ្ឋានយោធាយុទ្ធសាស្ត្ររបស់ខ្លួននៅស៊ីរី ទោះបីជាមានភាពតានតឹងពាក់ព័ន្ធនឹងសុវត្ថិភាពរយៈពេលវែងនៃមូលដ្ឋានទាំងនេះក៏ដោយ។ អ្នកវិភាគលោកខាងលិចមើលឃើញថា ការបាត់បង់វត្តមានរបស់រុស្ស៊ីនៅស៊ីរីជាការខូចខាតដល់ឥទ្ធិពលរបស់ខ្លួននៅមជ្ឈិមបូព៌ា និងមេឌីទែរ៉ាណេ។

ការរំដោះមន្ទីរឃុំឃាំងល្បីៗ ដូចជា “រោងសម្លាប់មនុស្ស” នៅពន្ធនាគារសែដណាយ៉ា បានបង្ហាញពីការរៀបរាប់ដ៏រន្ធត់នៃការធ្វើទារុណកម្ម និងការរំលោភបំពានក្រោមការគ្រប់គ្រងរបស់អាសាដ។ កិច្ចខិតខំប្រឹងប្រែងដើម្បីដោះលែងអ្នកទោសដែលនៅសល់នៅតែបន្ត ទោះបីជាការចូលទៅកាន់ផ្នែកក្រោមដីមួយចំនួននៅតែមានកម្រិតក៏ដោយ។

មេដឹកនាំទូទាំងពិភពលោក រួមទាំងនាយករដ្ឋមន្ត្រីចក្រភពអង់គ្លេស លោក ស៊ើ កៀ ស្តាមឺ និងប្រធានាធិបតីបារាំង លោក អេម៉ានុយអែល ម៉ាក្រុង បានស្វាគមន៍ការដួលរលំរបស់អាសាដ ដោយសម្តែងក្តីសង្ឃឹមសម្រាប់សន្តិភាព និងការកសាងឡើងវិញ។ ទោះយ៉ាងណា អ្នកជំនាញសង្កត់ធ្ងន់លើតម្រូវការសហប្រតិបត្តិការអន្តរជាតិដើម្បីធ្វើឱ្យស៊ីរីមានស្ថិរភាព និងការពារកុំឱ្យមានភាពវឹកវរបន្ថែមទៀត ដែលអាចនាំឱ្យមានការផ្លាស់ទីលំនៅថ្មី និងចលាចលភូមិសាស្ត្រនយោបាយ៕